publicidade hoxe
Publicidade
omeulibro1

Galicia rexistra un total de 378 incidencias debido ao mal tempo

Europa Press
Un dos accidentes rexistrados

Un dos accidentes rexistrados

Un total de 378 incidencias foron xestionadas, entre as 8,00 horas do domingo e as 11,00 horas deste luns, polo persoal do 112 Galicia, relacionadas coa meteoroloxía adversa que, desde este domingo afecta á Comunidade galega. Neste momento continúa activo o nivel laranxa por vento no litoral das provincias da Coruña, Lugo e Pontevedra, con refachos que poden alcanzar os 100 quilómetros por hora.

No referido período foron atendidas un total de 3.807 chamadas. A maioría das intervencións, un 43%, estiveron relacionadas coa caída de árbores e ramas e, en menor medida (un 13%), coa acumulación de auga en estradas e anegamentos en rúas, baixos comerciais e vivendas, sen que se rexistrase ningunha de gravidade.

As horas nas cales se rexistrou unha maior actividade no 112 Galicia foron entre as 13,00 e as 15,00 horas do domingo, e ás 10,00 horas desta mañá, coincidindo coa caída dunha forte tromba de auga.

PROVINCIAS MÁIS AFECTADAS

Por provincias, a máis afectada foi a de Pontevedra, cun 43% das incidencias rexistradas, seguida da Coruña, cun 35%; Ourense, cun 14%, e un 7% para Lugo.

En canto aos concellos máis afectados, foron os de Padrón, Ortigueira, Rianxo, Arzúa e Santiago de Compostela, onde unha forte tromba de auga esta mañá ao redor das 10.30 horas provocou múltiples incidencias e afectou á circulación na cidade.

Pola súa banda, na provincia de Pontevedra, o municipio máis afectados foron Bueu, Cangas, Lalín, Vigo, Vilagarcía e O Porriño; e en Ourense, Muíños, Vilar de Barrio, Castro Caldelas, Ramirás e a capital de provincia. Por último, en Lugo, os municipios máis afectados foron os do Saviñao, Palas de Rei e Lugo.

INCIDENCIAS EN CENTROS EDUCATIVOS

A Consellería de Cultura, Educación e Ordenación Universitaria informou de incidencias relacionadas coa meteoroloxía adversa na cidade de Pontevedra.

Nun dos casos trátase do desprendemento dunha xanela do IES Sáchez Cantón, sen ningunha consecuencia para a comunidade educativa; mentres que noutro caso, rompeu un enreixado que separa o CEIP A Xunqueira Nº 1 e Nº2 debido á caída dunhas árbores no recinto do primeiro dos centros. Ademais, o CEIP Viñagrande-Deiro, en Vilanova de Arousa, sufriu danos na súa cuberta.

AFECTACIÓN NAS FESTAS DO SAN FROILÁN

Os concellos están a adoptar as medidas oportunas para facer fronte a esta situación e, por exemplo, en Lugo foron pechados os parques da Milagrosa e Rosalía de Castro, en plena xornada festiva polos festexos de San Froilán.

Así, foron suspendidos os concertos de Riobó, Treixadura e Cantigas e Agarimos na Praza da Horta do Seminario, así como os fogos artificiais desde rúa Poeta Noriega Varela debido ás fortes precipitacións.

5 de outubro de 2015 | 16:51 • Sen comentarios

Comentarios pechados.