Comezan as obras de adecuación e mellora da estación de autobuses de Monforte de Lemos
A delegada territorial da Xunta de Galicia na provincia de Lugo, Raquel Arias Rodríguez, supervisou esta tarde o comezo das obras de adecuación e mellora da estación de autobuses de Monforte de Lemos.
“Estas actuacións”, explicou Arias, “resolven as carencias detectadas recentemente nas instalacións da estación e van repercutir nun mellor servizo para todos os usuarios porque incrementarán a calidade do transporte público e, en consecuencia, fomentarán o seu uso”.
Os traballos que comezaron hoxe, promovidos con carácter urxente pola Consellería de Infraestruturas e Vivenda a través da Dirección Xeral de Mobilidade, contan cun investimento de 20.000 euros.
A Xunta, tras supervisar o estado das instalacións, constatou a necesidade de levar acabo accións de reparación e mantemento. As melloras que se están a acometer consisten na substitución de falsos teitos nos aseos, nos despachos de venta de billetes e no vestíbulo da estación.
O actual teito de escaiola mudarase por un falso teito rexistrable, ao que tamén se adaptará a iluminación. A maiores, revisaranse e limparanse a cuberta, as súas baixantes e os canalóns.