Carmela Silva e José Balseiros asinan un acordo para a cesión da recadación executiva ao ORAL
A presidenta da Deputación, Carmela Silva, e o alcalde de Cerdedo, José Balseiros, aproveitaron a xuntanza oficial de hoxe para ratificar o convenio polo cal o Concello lle cede ao ORAL a recadación executiva dos impostos municipais.
Silva e Balseiros mantiveron este encontro no marco das xuntanzas que a presidenta está a manter con todos os alcaldes da provincia para explicarlles aos rexedores a nova política que se está a desenvolver na Deputación e as liñas estratéxicas do novo goberno.
De feito, o alcalde de Cerdedo felicitou a Carmela Silva polos cambios introducidos no plan de emprego, no que se ampliaron as xornadas e os salarios dos traballadores, e polo aumento das subvencións para o servizo de axuda no fogar.
Pola súa parte, a presidenta da Deputación aseguroulle ao alcalde de Cerdedo que estudará as deficiencias de dúas estradas provinciais que atravesan o termo municipal e que foron recentemente arranxadas para subsanalas no menor tempo posible.