publicidade hoxe
Publicidade
omeulibro1

Brión organiza catro obradoiros de outono sobre agricultura ecolóxica e saúde

PUBLICADO EN: Noticias de GaliciaBrión
A-
A+

O Concello de Brión organiza catro Obradoiros de Outono sobre ecoloxía e saúde, que terán lugar entre os meses de outubro e novembro. Uns cursos para os que xa está aberto o prazo de inscrición, que poderá realizarse ata unha semana antes do comezo de cada obradoiro na Casa da Cultura de Brión ou no teléfono 981 50 99 08.

O primeiro obradoiro será “Micoloxía e aproveitamento forestal”, que terá lugar este sábado 17 de outubro no centro social polivalente. Un obradoiro gratuíto que se desenvolverá en dúas partes: unha teórica (de 10:00 a 14:00 horas) e outra práctica, con saída, recollida e cociñada de cogomelos entre as 16:00 e as 20:00 horas. 

Mazás e saúde 

Para os dous primeiros venres de novembro está programado o obradoiro “Aproveitamento das mazás”, que terá lugar de 18:30 a 21:30 horas no centro social polivalente de Brión. Nas clases, o alumnado aprenderá a elaborar marmelada, marmelo e sidra. A cota de inscrición é de 30 euros. 

Os outros dous obradoiros terán un custe de 15 euros cada un. O primeiro será o venres 20 de novembro e versará sobre “Saúde, fogar e aseo sen químicos”. O segundo, titulado “Froita e verdura creativa”, é un obradoiro de cociña para nenos e maiores que terá lugar o venres 27 de novembro. En ambos casos, o horario será de 18:30 a 21:30 horas no polivalente.

Para a realización de cada un destes obradoiros será precisa a inscrición dun mínimo de 10 persoas. O curso está aberto a todos os interesados, tendo preferencia a veciñanza de Brión.

13 de outubro de 2015 | 18:44 • Sen comentarios

Comentarios pechados.