A Policía Local de Cangas continúa co control aos accesos do mercadillo
A Policía Local de Cangas controlou, esta mañá, os accesos ao mercadillo en varios puntos da vila. Este operativo policial deu comezo ás 6:00 da mañá dende o Concello ata a rotonda do Paseo Marítimo e foron identificados un por un cada vehículo. Ademais contaron coa colaboración da Garda Civil.
Por outra banda, este dispositivo prolongouse tamén ao control dos postos e licencias dos vendedores. Controlouse que a venda a exerza o titular do posto, salvo excepcións, pero que en calquera caso estiveran debidamente identificados, e estes documentos se atopasen en regra, tal e como indicaba o bando que onte mesmo asinaba o alcalde, Xosé Manuel Pazos.
Así mesmo a Policía confirma que a mañá transcorreu con normalidade, sen incidentes destacados, salvo o feito de que, por decreto de alcaldía, se viron na obriga de levantar un dos postos do mercado, por ser un dos implicados na liorta de fai dúas semanas.