A alarma da vivenda de Teo foi desconectada na véspera do día que Asunta non foi a clase por estar mal
O fiscal do caso Asunta desvelou este xoves, durante o seu interrogatorio á acusada, a nai da menor, Rosario Porto, que a alarma da casa de Montouto, en Teo (A Coruña), foi desconectada durante varias horas na véspera do día que Asunta Basterra non acudiu a clase por atoparse mal.
Previamente, Porto dixo que ela non fora dende había un tempo a esa casa -onde a acusación sostén que se produciu o crime- ata o mesmo día da morte da menor. Non obstante, nos documentos mostrados polo Ministerio Fiscal figura que catro días antes da morte de Asunta alguén desconectou a alarma entre as 17,35 e as 22,40 horas.
Ás preguntas do fiscal, a acusada negou que fose ela e explicou que só tiñan chaves do terreo o seu exmarido, Alfonso Basterra, con quen a nena pasou a tarde; e un veciño.