O fiscal do caso Asunta sinala que custou atopar o portátil de Alfonso Basterra
O fiscal do caso Asunta advertiu este mércores ao xurado popular de que “o portátil de Alfonso -Basterra, o pai adoptivo da menor, e un dos dous acusados da súa morte, xunto á súa exmuller Rosario Porto- custou atopalo”.
“Ten a súa relevancia”, indicoulles nunha longa exposición na que o representante do Ministerio Público, Jorge Fernández de Aránguiz, presentouse e explicou aos membros do xurado cal será o seu papel no xuízo que desde este martes e até finais de outubro tratará de determinar quen acabou coa vida da nena en setembro de 2013.
Despois de que se rexeitase a petición das defensas de restricións á cobertura informativa do xuízo, o secretario xudicial deu lectura aos escritos de cualificación das partes, e tomou a palabra, en primeiro lugar, o fiscal Fernández de Aránguiz.
Mentres Basterra se mostra serio e reflexivo durante esta primeira xornada na que foron trasladados desde o centro penal de Teixeiro até os xulgados de Santiago, Porto está cabizbaixa e mesmo chorou, como despois de que o presidente do tribunal decidise permitir a retransmisión de imaxes do proceso, en contra do que reclamaron as defensas.