publicidade hoxe
Publicidade
omeulibro1

Curtis propón accións locais e con outros colectivos e administracións para promover o consumo do leite ‘Galega 100’

PUBLICADO EN: Noticias de GaliciaCurtis
A-
A+

O Goberno local de Curtis levará ao próximo Pleno da Corporación unha moción proposta pola Alcaldía e a concellaría de Medio Rural para impulsar o consumo do leite ‘Galega 100%’ e pór en valor un produto de excelente calidade do que viven decenas de familias do municipio. A iniciativa destaca a necesidade de axuntar esforzos de administracións e colectivos para identificar a orixe do leite e que esta calidade diferenciada producida nas explotacións gandeiras locais chéguelle aos consumidores.

Por iso, o equipo de Goberno proporá á Consellería de Medio Rural e do Mar a adhesión do Concello de Curtis á campaña da marca ‘Galega 100%’ así como a posta en marcha de accións conxuntas cos colectivos sociais e empresariais do municipio para a promoción de consumo lácteo. Entre estas actuacións, destacarían aquelas de concienciación coas asociacións de consumidores a través da repartición de leite co selo ‘Galega 100%’ e da visita ás explotacións gandeiras e industrias lácteas adheridas á campaña, ademais doutras medidas de promoción co gremio de hostaleiros. O Concello tamén quere potenciar a entrega de leite galego nos principais eventos e festas da zona. 

Nesta mesma liña, a proposta da Alcaldía tamén inclúe solicitar á Deputación da Coruña a elaboración dun plan de apoio ao sector lácteo para impulsar a mellora da calidade do leite en colaboración coas cooperativas e de forma coordinada con outras accións da Unión Europea, o Ministerio de Agricultura, Alimentación e Medio Ambiente e a  Consellería de Medio Rural. Esta solicitude xa foi defendida polo alcalde Javier Caínzos en calidade de deputado no último Pleno da institución provincial. 

Para o Concello de Curtis, estas accións en defensa do sector lácteo veñen complementar todas aquelas encamiñadas a conseguir un prezo xusto polo leite, vital para a supervivencia das explotacións tanto do municipio como do resto de concellos e comarcas do rural. 

20 de setembro de 2015 | 12:14 • Sen comentarios

Comentarios pechados.