Apróbase unha modificación puntual do PXOM de Sarria para ampliar o asentamento industrial de Betote
A Consellería de Medio Ambiente Territorio e Infraestruturas vén de notificar ao concello de Sarria a orde de aprobación definitiva da modificación puntual das Normas Subsidiarias de Planeamento Municipais para a regularización e ampliación do asentamento industrial de Betote.
A modificación que delimita un ámbito de 7,42 hectáreas con acceso pola C-546, situado a uns 2,6 Km. de Sarria, no lugar de Balmao, incluíndo terreos das parroquias de Betote e Vilar, concíbese como un único ámbito dividido en dous polígonos. No ámbito delimitado existe un asentamento de actividades económicas (terciarias e industriais) que ocupa unhas 4,57 hectáreas, constituído por 9 naves principais e outras edificacións menores ou complementarias. Trátase dun asentamento xurdido en solo rústico na década dos 90, que conta con autorizacións autonómicas para parte das naves.
A orde de aprobación definitiva foi emitida tras verificar os técnicos autonómicos que a nova documentación remitida polo concello a finais de maio corrixe as indicación recollidas na Orde de Non Aprobación do pasado 2 de febreiro de 2014, nomeadamente:
• Avaliación ambiental: Incorporáronse as determinacións esixidas pola Memoria Ambiental de 24 de abril de 2014. Inclúese no informe de sostibilidade ambiental o informe requirido polo órgano ambiental en relación coa integración das determinacións finais da memoria ambiental.
• Acreditación das edificacións rematadas antes do 1 de xaneiro de 2003: O novo proxecto xustifica as súas determinacións mediante fotografía aérea de data agosto de 2002, certificado de antigüidade, informe municipal e base topográfica da Xunta de Galicia de 2003.
• Cómputo de prazas de aparcamento: Cumpren coas esixencias establecidas pola lei. A ordenación prevista contempla unha reserva mínima de 236 prazas, resultantes de aplicar unha praza por cada 100 m2 de edificabilidade industrial, das cales un cuarto serán públicas.