A Fiscalía pide como testemuña á funcionaria que atendeu a Porto e Basterra cando pediron a incineración do cadáver

O fiscal do caso Asunta, Jorge Fernández de Aránguiz, pediu que durante o xuízo compareza como testemuña a funcionaria que atendeu a Rosario Porto e Alfonso Basterra no xulgado cando estes acudiron para solicitar a incineración do cadáver da súa filla. Ademais desta petición e outras de tipo formal e de incorporación de testemuño, solicitou que se consideren como proba exemplares dos diarios ‘La Voz de Galicia’ e ‘El Correo Gallego’ correspondentes á “semana inicial da investigación” dos feitos.

Así mesmo, advertiu de que é posible que non poida acudir o día en que está chamado a declarar un funcionario que estivo presente na reconstrución do percorrido que realizou a nai da nena do día dos feitos. Por iso, solicitou que acuda o seu compañeiro.

Durante a intervención de Aránguiz, a acusada, Rosario Porto, chorou en repetidas ocasións, como no resto da xornada, pero tamén lle mirou cun rostro severo cando o fiscal pedía cuestións relativas á comprobación da pista forestal na que se achou o cadáver da nena, feito que provocou que ela falase co seu avogado, José Luís Gutiérrez Aranguren.