A familia do batería de Los Piratas espera que as testemuñas axuden a probar a desproporcionalidade do axente

A familia do batería de Los Piratas espera que as declaracións das testemuñas citadas este mércores no xulgado de Ponteareas (Pontevedra) sirvan para aclarar o ocorrido o pasado 26 de agosto e para evidenciar a “desproporcionalidade” na actuación do garda civil que efectuou o disparo que acabou coa vida do músico.

Na xornada deste mércores está previsto que comparezan no xulgado de instrución número dous de Ponteareas cinco testemuñas: unha veciña e un amigo da parella, dous sanitarios e o axente que supostamente foi atacado por Javier Fernández.

O letrado que representa os intereses da viúva e o seu bebé, Gerardo Gayoso, explicou que solicitará cantas dilixencias sexan necesarias para aclarar os feitos, entre elas, careos ou reconstrución do sucedido, dado que existen versións contraditorias sobre as circunstancias nas que o batería recibiu o disparo.

Mentres que a Garda Civil sostén que a intervención na vivenda produciuse por un suposto caso de violencia de xénero e que o axente se viu obrigado a disparar ante a agresividade de Javier Fernández, a familia mantén que a vítima “xamais foi un maltratador” e que o seu comportamento se debeu ao trastorno bipolar que padecía desde hai anos.

Segundo apuntou o avogado, o propio atestado policial reflicte que nin a muller nin o neno estaban en perigo cando chegou a Garda Civil á casa e que os axentes estaban advertidos de que Javier Fernández estaba a sufrir un brote psicótico.

“DESPROPORCIONALIDADE”

Ante iso, a familia pretende demostrar que o disparo do axente contra o músico foi un acto desproporcionado e, de feito, hai uns días o avogado confirmara que baralla a posibilidade de exercer a acusación por un suposto delito de homicidio imprudente.

Unha das testemuñas citadas, un amigo do falecido, é considerado “fundamental” pola familia, xa que este asegura que cando viu ao garda “desenfundar e montar a súa arma” insistiulle en que Javier Fernández estaba enfermo.

Finalmente, o letrado recoñeceu que existe un parte de lesións dun axente, que sufriu “unha pequena erosión no nariz”, algo que, segundo Gerardo Gayoso, non merecía a resposta que deu o outro garda. Ademais, avanzou que se a xuíza de instrución non o fai, el mesmo pedirá que declare o autor do disparo para saber “que lle pasou pola cabeza”.