A concelleira delegada de Servizos Sociais participará na asemblea do Fondo Galego de Cooperación
Rocío López, concelleira delegada da área de servizos sociais, participará mañá martes en Santiago de Compostela na Asemblea Xeral do Fondo Galego de Cooperación e Solidariedade, entidade da que é socio o Concello da Laracha. Na xuntanza, que dará comezo ás 12:00 horas na sede da Fegamp, someterase a aprobación a composición da nova Comisión Executiva, conformada por representantes de distintas administracións locais e provinciais. Péchase así o ciclo 2011-2015 e ábrese a lexislatura 2015-2019 da rede solidaria do municipalismo galego, polo que se trata dun encontro clave para incorporar a defensa dos Dereitos Humanos na axenda local.
Representantes dos 85 concellos e das dúas deputacións que fan parte do Fondo Galego están chamados a participar na sesión, que arrincará co balance dos últimos catro anos, presentado pola presidenta en funcións, Teresa París. Votarase logo a renovación orgánica, para dar paso por último ao apartado de rogos e preguntas. Neste punto, exporanse as opinións ao respecto da actual crise migratoria e de persoas refuxiadas, que ademais servirán de guía para tomar futuras decisións neste senso. O Fondo Galego xa publicou unha declaración institucional arredor desta cuestión e tamén o Concello da Laracha anunciou a súa disposición para, en colaboración coa Xunta de Galicia e a Fegamp, acoller refuxiados ofrecéndolles temporalmente aloxamento en instalacións municipais, así como todos os servizos e infraestruturas que están a disposición dos veciños do municipio.
O Fondo Galego
O Fondo Galego de Cooperación e Solidariedade está integrado por 85 concellos e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.