Rueda reprocha á oposición que vexa fraude na censura de Boimorto mentres planean outra na Deputación de Lugo

O vicepresidente da Xunta e secretario xeral do PPdeG, Alfonso Rueda, recriminou este mércores a PSdeG e BNG que falen de “fraude electoral” no relativo á moción de censura de Boimorto (A Coruña), cando estas mesmas formacións “levan dende o minuto un” planeando unha operación deste tipo na Deputación de Lugo.

“E constituíuse tan lexitimamente como o Concello de Boimorto”, comparou Rueda, a preguntas dos xornalistas ao respecto, antes de insistir en que é “moi sorprendente” que estas formacións se expresen neses termos sobre a censura en Boimorto.

Ao seu xuízo, este tipo de declaracións “demostran” a súa “incoherencia”, máxime cando o PP quedou “a moi poucos votos da maioría absoluta” neste municipio coruñés. “E sempre dixemos que aspirabamos a gobernar onde gañamos as eleccións”, remachou.

En Boimorto, os cinco edís do PP contan co apoio dun candidato socialista -que xa de inicio se inscribiu no grupo dos non adscritos- para remover un goberno composto por tres concelleiros do PSOE e dous do BNG. Está previsto que a votación se celebre o próximo día 14.