Unha muller sofre inhalación de fume en Vilagarcía tras un incendio nun apartamento

Dous incendios en senllas vivendas na Pobra do Caramiñal e en Vilagarcía de Arousa provocaron unha intoxicación por inhalación de fume a unha muller, segundo informou o 112 Emerxencias Galicia. A ferida estaba no interior dun apartamento situado na rúa Extramuros do municipio de Vilagarcía cando se iniciou un lume dentro dunha habitación. Unha vez sufocado, os efectivos do parque comarcal de bombeiros confirmaron que resultou calcinado un colchón.

Até o lugar desprazáronse, ademais dunha dotación do servizo municipal de emerxencias, Protección Civil e axentes da Policía Local e Nacional. O CAE 112 Galicia tivo constancia do incendio grazas á chamada dun particular ás 19,45 horas do luns. A partir de aí, o persoal do Centro de Atención ás Emerxencias de Galicia puxo en marcha un operativo que finalizou a súa intervención unha hora e media máis tarde.

Por outra banda, na Pobra do Caramiñal rexistrouse outro incendio que afectou a unha casa abandonada situada no lugar de Cadreche, parroquia de Posmarcos. O lume arrasou dúas habitacións das plantas superiores e a calor provocada polas chamas afectou á planta baixa. Un particular decatouse do incendio ás 20,00 horas do luns e chamou ao 112 Galicia para solicitar a colaboración dos servizos de extinción.

Os xestores do CAE 112 Galicia avisaron aos Bombeiros de Boiro e Ribeira, aos membros de Protección Civil da Pobra do Caramiñal e ás forzas da orde.