Tommy Hunt e Naomi Shelton actuarán no ‘Outono Códax 2015’

‘Outono Códax’, festival de soul, rithmic&blues, funk e rock ‘ n roll dos anos 60 celebrado en Santiago de Compostela, combinará a música contemporánea con bandas de referencia no panorama internacional, así como grupos galegos. Deste modo, artistas como ‘Mike Sánchez & His band’, Naomi Shelton ou Tommy Hunt -mítico vocalista de ‘The Flamingos’- estarán no cartel deste certame.

‘Outono Códax’ celebrarase na Sala Capitol en Santiago de Compostela os días 19 e 26 de setembro e 3 de outubro. Así mesmo, para conmemorar o seu aniversario, o festival acollerá, por primeira vez na súa curta historia, un concerto fóra das fronteiras de Galicia, concretamente en Gijón o próximo venres 2 de outubro.

De forma simultánea, organízase unha exposición nos cines NUMAX, próximo á Sala Capitol, onde se celebrarán os concertos, con obras do fotógrafo inglés Lawrence Impey. O propietario da tenda A Reixa, Fran Villasenin, afirmou que na mostra se poderán ver fotografías do primeiro disco de ‘The Police’ ou de ‘Blondie’.

A exposición, con imaxes dos anos 70, poderase visitar dende o 15 de setembro ata o 10 de outubro. A ela uniranse, ao final de cada concerto, as chamadas ‘sesións out’: pequenos concertos gratuítos na rúa.

O responsable de Raiña Productions, Martín Calviño, afirmou este martes que será un “festival espectacular”, xa que o cartel deste ano é “moi equilibrado”, con música “rithmic&blues, gospel e rock’n roll”, entre outros ritmos.

CARTEL DO FESTIVAL

En canto ao cartel, ‘Outono Códax’ celebrarase en tres sábados consecutivos: o primeiro concerto, o 19 de setembro. O encargado de abrir o festival será ‘Transilvanians’, un grupo galego de R&B xamaicano. Compartirá escenario con ‘Mike Sánchez & His Band’ e ‘David Hooper & The Silverbacks’, grandes artistas internacionais.

O segundo concerto, que se celebrará o 26 de setembro, acollerá as actuacións de Tommy Hunt, que actuará en calidade de artista invitado, ‘The New Flamingos’ e os cataláns ‘The Velvet Candles’. A eles uniranse ‘The Gospel Session’ e ‘Sabela Kink & Heartbreakers’, artista encargada de abrir esta sesión.

No último dos concertos, que se celebrará o 3 de outubro, artistas como ‘Naomi Shelton & The Gospel Queen’, ‘Juan Celada Band’ e ‘The Soul Jacket’ finalizarán este festival de música soul, rithmic&blues, funk e rock ‘ n roll dos anos 60.

Este ano, como novidade, o festival expándese ata Gijón para conmemorar o seu quinto aniversario. ‘Extraoutono’, que así é como se denominou esta nova sede, celebrarase o próximo 2 de outubro en Gijón, na sala Acapulco. Os galegos ‘The Lákazans’ abrirán unha noite na que ‘Naomi Shelton & The Gospel Queen’ tamén estarán no cartel.

ENTRADAS E ‘ROCK AND PORTE’

As entradas para ‘Outono Códax’ teñen un prezo de 20 euros en venda anticipada e de 24 en taquilla. Así mesmo, o festival ofrece a opción de adquirir un bono para os tres concertos celebrados en Santiago por 39 euros. Este prezo manterase ata o 31 de Agosto. A partir deste momento, o bono custará 46 euros.

Do mesmo modo, e como xa se realizou en anteriores edicións, mediante o ‘rock’n porte’, o público pode adquirir entradas gratis para un dos concertos celebrados en Santiago. Para iso, coa consumición ou compra nalgún dos establecementos que se adheriron a esta iniciativa, conseguirán selos. Con 10 deles, obterán unha entrada gratis.