Santín cre que a alcaldesa de Viveiro deixará de militar no PSOE en breve

O secretario provincial do PSOE de Lugo, Juan Carlos González Santín, prevé que a alcaldesa de Viveiro, a socialista María Loureiro, deixará “en breve” de militar no PSOE, tras a apertura de xuízo oral contra ela por un suposto delito de prevaricación urbanística, e o fará en cumprimento do código ético polo cal “ningún socialista pode sentar no banco dos acusados”.

Precisamente, o pasado xoves a alcaldesa de Viveiro (Lugo), a socialista María Loureiro, asegurou que se atopa “tranquila” ante a apertura de xuízo oral e ratificou que non deixará o seu cargo de rexedora, aínda que si se axustará ao código ético do PSdeG, no que deixará de militar.

Neste sentido, Santín sinalou que o PSOE “ten un código ético claro” e “todo o mundo sabe o que ten que facer”. “Se que a alcaldesa de Viveiro, María, é unha muller responsable, que vai antepoñer os intereses de partido aos seus intereses persoais”, subliñou.

“Se que tomará unha decisión en breve, e esa decisión, dende logo, será a que tomaría calquera cargo socialista”, sostivo. Preguntado sobre cál será esa decisión, Santín respondeu: “Pois, evidentemente, a decisión que terá que tomar, non queda outra que asumir ese código ético de que ningún socialista pode sentar no banco dos acusados”.

“Temos moi claro que ningún cargo socialista vai sentar no banco dos acusados”, reiterou nas súas explicacións ante a prensa González Santín.

BESTEIRO

Por outra banda, preguntado sobre a situación do secretario xeral do PSdeG, José Ramón Gómez Besteiro, imputado no caso das torres do Garañón, Santín dixo “compartir” as críticas do líder dos socialistas galegos polo aprazamento da súa declaración que estaba prevista para este venres.

“Remítome ao comunicado que el fixo”, limitouse a sinalar, en alusión ao texto no que o pasado xoves Besteiro cualificou de “inxustificable” que se atrase á súa declaración ante a xuíza Pilar de Lara.

Cuestionado sobre se cre que Besteiro debe abandonar o seu cargo no suposto de que a súa imputación se alongue no tempo, Santín volveu expoñer que os socialistas “teñen unha liña vermella, que é apertura de xuízo oral e que ningún socialista vai sentar” no banco dos acusados”.

“Isto inclúenos todos, inclúe os cargos públicos, inclúe o secretario provincial de Lugo e inclúe o secretario xeral de Galicia, e, todos, evidentemente, cumpriremos co código ético e coas normas do partido”, resolveu.