Preto de 200 persoas visitaron a aldea medieval de San Cosme no marco das Xeiras do IEM

Visita á aldea medieval

A tarde ameazaba choiva mais rematou sendo ideal para para camiñar “pola agradable temperatura e o doado camiño que percorremos dende A Chan da Lagoa ata o núcleo de San Cosme e a Fonte Santa”, sinala o profesor Xilberte Manso do Instituto de Estudos Miñoranos.  Salienta a presenza de polo menos 180 persoas entre veciños e visitantes que concorreron á convocatoria do IEM a esta visita guiada polo mozo de Baíña e historiador baionés, Anxo Rodríguez Lemos, da Sección de Historia, Arqueoloxía e Toponimia do IEM.

O percorrido transcorreu cun“completo e pormenorizado relato histórico, adobiado con anécdotas e testemuñas dalgúns dos últimos antigos habitantes nativos da aldea, que Anxo soubo enfiar cronoloxicamente e moi ben documentado”, engade Xilberte Manso.

O calendario das Xeiras do IEM continuará cunha andaina pola Estrada Real da Ponte da Ramallosa até a antiga porta de entrada a Baiona. Será o vindeiro mércores 5 de agosto ás 18 horas e contará coa novamente coa guía de Anxo Rodríguez Lemos, acompañado do arquitecto Antonio Soliño Troncoso e o director do IEM, o historiador Carlos Méixome Quinteiro.