Cambre contratará o servizo dun guindastre nos próximos meses

O alcalde de Cambre, Óscar García Patiño, asegura que se están elaborando os pregos de contratación para que o concello teña servizo de retirada de vehículos. Desde o mes de agosto de 2014 o servizo deixou de realizarse ante a finalización do contrato da anterior adxudicataria. A inexistencia do servizo provocou serios problemas aos veciños, xa que ningunha empresa dedicada  a este tipo de servizo quíxose facer cargo das retiradas de vehículos de forma puntual. Mesmo, os veciños dunha urbanización de O Amorne denunciaron nunha ocasión o taponamento exercido por un vehículo abandonado no seu vao, o que imposibilitaba a saída  dos seus garaxes. Houbo que esperar varios días a que a Policía Local achará ao dono do turismo, xa que ningunha empresa se prestou a realizar este servizo aínda que fóra de forma puntual.

As xestións do actual goberno local cunha empresa que realiza o servizo en varios concellos limítrofes permiten ao concello nestes momentos a dispor dos seus servizos si requíreselles puntualmente.

García Patiño sinala que é coñecedor das conversacións que se mantiveron entre os alcaldes da área metropolitana, que estudaron o poder consorciar este servizo tan necesario para os veciños, pero ante a dilación do proceso o alcalde asegura que non vai esperar ao Consorcio. “Non podemos demorar a contratación deste servizo, e por tanto porémonos a traballar xa nas súas bases para licitalo canto antes”, apuntou. Indica, doutra banda, que non supón un “carpetazo” ás negociacións co consorcio senón que se trata de dar resposta a unha demanda veciñal.