A V Regata Cabos do Norte Gran Premio Coreti dispútase este sábado
Este próximo sábado a partir das 13:00 horas e se o tempo o permite, dará comezo nas inmediacións do porto de Sada a esperadísima Regata Cabos do Norte Gran Premio Coreti de Cruceiros na súa V Edición que organiza o Club Náutico de Sada co patrocinio da firma de etiquetaxe industrial Coreti e a colaboración da Mariña Varadero de Sada.
A regata, como é tradicional, partirá de Sada para chegar até a Illa da Coelleira, xa en augas do Cantábrico, que se virará deixándose a babor e regresando a Sada novamente. Un percorrido dunhas 105 millas náuticas (195 Km.), que a converte na proba máis longa do panorama náutico galego e unha das maiores de toda a península.
A previsión meteorolóxica esta vez é moi aceptable, xa que están previstos ventos do E-NE con intensidade variable entre os 12 nós do principio e os 22 de máximo que se preveen á primeira hora do domingo, se é que os barcos non finalizaron xa na súa totalidade a esa hora ou probablemente poidan estalo facendo. É dicir, un rumbo de cinguida até a Coelleira e de popa e longo no regreso a Sada, co cal, todos os participantes terán a súa oportunidade aínda que as súas características sexan mellores con ventos de proa ou de popa.
Difícil vano a ter os participantes entón para bater a marca da proba que até o momento está poder do MIRFAK cun tempo de 14 horas, 59 minutos e 17 segundos, xa que os ventos do norte serían os máis favorables para iso.
A regata poderá verse nesta ocasión en directo mediante un sistema de seguimento en tempo real en calquera computador ou teléfono con internet.
E o domingo pola tarde ás 19:00 horas será a entrega de premios no Club.
Lembremos que os vencedores na anterior edición foron
Categoría ORC-A, LOSQUEADA de Francisco Edreira polo C.N de Sada
Categoría ORC-B, RAYGRASS de Tom Nuñez, Club Marítimo Carrumeiro .
Categoría A-DÚAS, G-10 de José Naya, Comisión Naval Regatas Ferrol
Categoría en solitario, LONESTAR de Óscar González, independente.