Trasladan ao condutor dun camión despois de envorcar en Serra de Outes

O condutor dun camión foi trasladado este xoves a un centro hospitalario tras sufrir un accidente co trailer que manexaba, segundo informa o 112. O camión, que transportaba cobre, envorcou cando circulaba pola estrada que une Serra de Outes co lugar de Valadares. Nun primeiro momento, o 112 solicitou a intervención dos bombeiros de Boiro, ante a posibilidade de que o ferido estivese atrapado no interior da cabina do camión.

Finalmente, non foron necesarios medios de excarceración, aínda que o persoal no punto si que axudou ao home a saír do vehículo. Igualmente, Urxencias Médicas, que xa tiña constancia do sinistro, descartou a mobilización do helicóptero medicalizado con base en Santiago unha vez comprobado que o home estaba liberado e accesible. A alerta foi recibida sobre as 11,30 horas e o 112 informou á Garda Civil de Tráfico, ao GES de Muros, a Protección Civil de Noia e Outes e á Policía Local.