Pontevedra acollerá do 14 ao 19 de xullo o XXIII Festival Internacional de Jazz e Blues

A cidade de Pontevedra acollerá do 14 ao 19 de xullo a XXIII edición do Festival Internacional de Jazz e Blues, unha cita cultural consolidada no calendario nacional e que volverá reunir a grandes figuras do panorama galego e internacional na urbe galega. Este mércores tivo lugar no concello a presentación deste evento a cargo da concelleira de Festas, Carme da Silva, e dos seus organizadores, Luís Carballo e Alberte Lastre.

A coincidencia con outras festas propiciou un adianto dunha semana nas datas tradicionais, algo que desde a organización esperan que non afecte á asistencia de público.

Esta nova edición do Festival de Internacional de Jazz e Blues, que continuará ofrecendo os seus concertos gratuítos, volverá caracterizarse, explicou a concelleira, pola súa “variedade” artística e por seguir apostando ser “vangardista e máis arriscado que outros” que se celebran noutros puntos do territorio nacional.

PROGRAMACIÓN

A programación do festival inclúe o 14 de xullo, na Praza do Teucro, a actuación de Felipe Villar Quartet. Trátase dun músico formado no Seminario Permanente de Jazz de Pontevedra e que, segundo Luís Carballo, “demostra que grandes músicos galegos están ao máximo nivel”.

Para o 15 de xullo, tamén na Praza do Teucro, espérase o concerto de Nani García Trío, que foi presentado como un “músico mítico na escena galega” que ofrecerá un espectáculo no que mestura antigos temas, retrincos de bandas sonoras e outras composicións reformuladas en clave de jazz.

O 16 de xullo, na Praza da Ferrería, programouse o concerto de Janiva Magness, unha cantante de blues estadounidense. “A súa voz, enigmática e poderosa, foi comparada coa da lendaria Bessie Smith pola súa particular forma de cantar rythm & blues ao estilo de Nova Orleans”, afirmaron desde a organización. A artista xa actuou en Pontevedra en 2008.

Neste mesmo escenario da Ferrería actuará o 17 de xullo ás 22.30 horas Terri Lyne Carrington, que é, segundo os organizadores do festival, a “gran estrela” deste ano. Esta percusionista estadounidense foi unha nena prodixio do jazz e a súa carreira empezou cando apenas tiña once anos.

Ao día seguinte será a quenda, no mesmo marco e á mesma hora, de Ruthie Foster, unha compositora e cantante orixinaria de Texas que conta cunha voz tan expresiva e natural que foi comparada con artistas da talla de Aretha Franklin ou Ela Fitzgerald.

O 19 de xullo, pola súa banda, actuará Virxilio da Silva Quinteto, un vello coñecido do festival que porá un “peche magnífico” a esta edición, segundo Alberte Lastre.

JAZZ POLA RÚA E PONTEJAZZ

Este ano mantéñense tamén no programa actividades paralelas como ‘Jazz pola rúa’, que protagonizará o grupo Chivinjazz percorrendo as rúas e prazas da cidade durante os días do festival; ou as ‘Jam Sessions’, que serán na praza Méndez Núñez a cargo de Valentín Caamaño Trío (14 e 15 de xullo), Javier Abaldes Trío (16 e 17 de xullo) e Pedro Freijeiro Trío (18 e 19 de xullo).

Ademais da parte lúdica, o Festival de Jazz seguirá apostando por unha proposta formativa que tivo moi boa acollida nos últimos anos, o ‘PonteJazz Workshop’. Celebrarase o mércores 15 ao sábado 18 de xullo no antigo conservatorio, situado na rúa Alfonso XIII. Impartirano, segundo avanzou Luís Carballo, dúas grandes figuras do jazz europeo, os holandeses Joris Roelofs e Mark Schilders.