O alcalde de Ourol rexeita que a edila popular que o votou sexa tránsfuga e estuda incluila no goberno

O alcalde socialista de Ourol (Lugo), José Luis Pajón, rexeitou este luns que a concelleira do PP Begoña Moreiras, que apoiou a súa investidura o sábado, sexa “unha tránsfuga” e atribuíu o seu voto ao “sentido común”. Ademais, apuntou que estudan a súa integración no goberno local. O PSOE foi a lista máis votada nos pasados comicios municipais, con catro concelleiros, seguido do PP con tres e Compromiso por Galicia, que obtivo dous. No pleno de constitución da corporación o Grupo Popular Municipal votou a favor do candidato de CxG.

“O PP non presentou candidato para ser elixido alcalde, e os outros concelleiros apoiaron a outra formación política e esta concelleira apoiou a nosa”, sinalou Pajón. “Outra cousa é que o PP presentase un candidato e esta concelleira non votase ao candidato da súa formación, pero non foi así. Iso de transfuguismo nada, é máis de sentido común”, destacou o alcalde en contra do que apunta o número dous do PP de Lugo, José María Balseiro, que suxeriu que levarán o caso á comisión antitransfuguismo.

Ademais, o alcalde de Ourol non descarta que Moreiras se integre no goberno municipal. “Estamos pendentes de falar con ela a ver se ten disposición a facelo e xa veremos a ver”, abundou. “Primeiro ímolo falar os concelleiros do PSOE. Se o vemos conveniente, si que llo formulariamos”, concluíu.