O alcalde da Pobra lamenta a morte dunha muller no municipio e confía en que o crime se resolva
O alcalde en funcións do municipio coruñés da Pobra do Caramiñal, Isaac Maceiras Rivas, cualificou de “moi lamentable” a morte dunha muller cuxo corpo foi atopado na noite do domingo con feridas de arma branca nun terreo do municipio e dixo que confía en que “se resolverá” o crime.
En declaracións, o rexedor destacou este luns que “A Pobra non se distingue por isto”, senón “polo “turismo e a súa xente traballadora”. Así, tras sinalar que “non gusta” que sucedan este tipo de feitos, Maceiras fixo fincapé en que “as investigacións están en boas mans”, en referencia á Garda Civil.
Por iso, o alcalde en funcións da Pobra apelou á “tranquilidade” dos veciños deste municipio coruñés e subliñou que “todo se resolverá”. Foi na noite do domingo cando o dono dun terreo atopou o corpo da muller cando se dirixía a regar no lugar da Fandiña. A falecida presentaba varias coiteladas no costado.
A Garda Civil investiga os feitos, que están baixo segredo de sumario, decretado por o Xogado de Instrución Número 1 de Ribeira en funcións de garda.