Glass Animals, Other Lives, Hercules & Love Affair, Dorian e Standstill estarán no Festival do Norte

Vinte grupos e seis dj´s conforman o cartel da décimo cuarta edición do Festival do Norte, a decana das citas galegas coa música independente. O evento repite este ano localización, na Illa de Arousa (Pontevedra), os días 3, 4 e 5 de xullo. O festival mantén un ano máis a súa filosofía de combinar grupos emerxentes da escena internacional con figuras consolidadas do panorama español da música independente.

Así, polos diversos escenarios cos que contará o evento pasarán artistas chegados desde fóra das fronteiras nacionais como Glass Animals, Other Lives, Neil Halstead ou Hercules & Love Affair.

A representación da música española correrá a cargo de nomes como Dorian, Standstill, Grupo de Expertos Solynieve, La Bien Querida, Fernando Alfaro, Hidrogenesse, White Bats, Perro, Chicharrón, Javiera Mena, Broncho, Los Punsetes, Cooper, Trajano!, Alex Casanova e Cazador.

A todos eles hai que sumar a presenza dos dj’s Amable, Viktor Ollé, Maadraassoo, Isaac Torgal e Pinche, encargados de pechar cada unha das xornadas.

CONCEPTO NOVO

Os organizadores do evento apostan este ano polo que definen como “un concepto novo e máis actual” de festival, no que as actuacións non se limiten á noite e aos dous escenarios principais. “A idea é que todo tipo de público, incluso o familiar, poida gozar das actividades musicais que se propoñen”, explica Antonio Caneda, organizador do festival.

Así, ademais das actuacións que teñan lugar a partir das 21,30 horas no escenario principal situado na praia de O Bao, o auditorio da Illa acollerá tanto o venres 3 como o sábado 4, a partir das 18.30, concertos de formato máis reducido ou íntimo.

A iso o festival suma unha serie de actuacións gratuítas o sábado e o domingo pola mañá que terán por escenario diversos locais de hostalaría do municipio. “Queremos trasladar o ambiente musical e a convivencia entre a xente a todos os recunchos da illa e implicar ao maior número de persoas posible”, engade o responsable do Festival do Norte.

CARTEL

No apartado artístico, os responsables do Festival do Norte destacan a presenza na Illa dos americanos Hercules & Love Affair, que visitan por primeira vez Galicia. A súa recuperación de sons disco e house primixenio que encheu as pistas de Nova York nos 70 e 80 converterá o escenario principal do festival, aseguran, “nunha pista de baile xigante”.

En canto á programación de grupos españois, os organizadores do Festival do Norte subliñan a presenza de Dorian, que celebrará o seu décimo aniversario na Illa presentando o seu novo disco, ‘Diez años y un día’, e a de Standstill, quen despois de 19 anos en activo, anunciaron oficialmente un parón indefinido. O do Festival do Norte será o seu último concerto na comunidade galega.

O festival arousán tamén acollerá os concertos de presentación dos novos traballos discográficos de artistas como Fernando Alfaro, La Bien Querida y Grupo de Expertos Solynieve, así como os debuts en directo de nomes emerxentes da escena independentes española como Perro, Chicharrón ou White Bats.

PREZOS E ACAMPADA

Os asistentes ao festival disporán dunha zona de acampada situada, do mesmo xeito que o ano pasado, na contorna da praia de Area de Secada.

Ata o 22 de xuño o prezo do abono do festival será de 35 euros e xa a partir dese día pasará a custar 40 euros. En despacho de billetes o importe do abono será de 45 euros e o da entrada dun día de 25.