Enviar a un amigo
Opinar
ImprimirA UDC retira a proposta de fusionar oito centros e avoga por unha reestruturación global
A Universidade da Coruña (UDC) constituirá unha comisión para estudar un plan de reestruturación “global” da institución, despois de que este martes o conselo de Goberno retirase a proposta de fusión de oito centros e aprobase por “unanimidade” a necesidade dunha reorganización xeral da institución académica.
En rolda de prensa tras a celebración do Consello de Goberno, o reitor da Universidade coruñesa, Xosé Luis Armesto, explicou que polo momento “non hai ningunha proposta”, tras retirarse aquela que o equipo rectoral puxera sobre a mesa para fusionar oito centros para lograr un aforro económico.
Non obstante, despois da reunión deste martes, o conselo de Goberno aprobou por “unanimidade” a necesidade dun “plan de reestruturación global”, non parcial, da universidade coruñesa.
Así, se abre un proceso para que a comunidade universitaria envíe as súas propostas sobre unha futura reestruturación xeral da institución, que serán analizadas pola comisión universitaria creada para este proceso.
“Non hai ningunha proposta sobre a mesa a día de hoxe. É crear un grupo de traballo que partirá dende cero e fará unha proposta de criterios xerais que despois se aplicarán aos casos concretos que se propoñan”, explicou Armesto sobre o funcionamento da comisión.
FINANCIAMENTO “INSUFICIENTE”
Segundo engadiu, esta nova formulación aborda a posibilidade dunha reestruturación “xeral” da UDC, unha universidade que, segundo recordou Armesto, conta cun actual plan de financiamento que resulta “insuficiente”.
De feito, as diferenzas do plan económico do sistema universitario galego fixeron que a UDC deixase de recibir este curso 3,8 millóns de euros, segundo cifrou Armesto. Unha cantidade á que habería que sumar outros case cinco millóns máis durante o vixente plan que finaliza este ano. Isto levou a universidade coruñesa a interpoñer un recurso contencioso-administrativo contra a Xunta.
“Non é certo que a Universidade da Coruña gaste máis. Sempre cumprimos co financiamento”, dixo o reitor, quen solicita á Xunta que adiante os cinco millóns que normalmente recibe ao finalizar o ano.
