Un home foi rescatado mentres se bañaba nunha praia de Rianxo
Un home foi auxiliado e rescatado nunha embarcación privada ao verse en apertos mentres se bañaba nunha praia do termo municipal de Rianxo (A Coruña). Segundo informou o 112 Galicia, os feitos sucederon sobre as 20,30 horas do domingo na praia de Castañeiro, no municipio coruñés de Rianxo.
O alertante que chamou ao CAE 112 Galicia para pedir auxilio indicou que a persoa se atopaba na auga e pedía axuda. Por iso, foron mobilizados Salvamento Marítimo, que desprazou unha embarcación e informouse á Policía Local e a Protección Civil de Rianxo e de Vilagarcía.
Os axentes da Policía Local explicaron ao 112 Galicia que se trataba dun home que habitualmente saía a nadar e que o vento foi a causa de que se afastase da costa e que se atopase con dificultades para volver. O home, unha vez rescatado foi trasladado ao centro de saúde da zona con síntomas de hipotermia.