O mal tempo obriga aos servizos de emerxencia a intervir por caídas de árbores e risco de desprendementos

As malas condicións meteorolóxicas obrigaron a intervir a bombeiros, Grumir e Protección Civil de varios municipios da comarca de Vigo, debido á caída de árbores na calzada e a riscos de desprendemento de elementos nas fachadas de edificios. Segundo confirmaron fontes dos bombeiros de Vigo e do 112, as intervencións repetíronse ao longo da xornada, aínda que ningunha foi por incidentes graves, nin se rexistraron danos persoais ou materiais.

Así, os bombeiros da cidade olívica actuaron en varias rúas da cidade pola caída de árbores (ou por risco de caída), e tiveron que acudir a retirar outros elementos perigosos, como chapas de tellados ou cristaleiras, que corrían perigo de caer á vía pública. Do mesmo xeito, o vento moveu gran número de colectores.

Nunha das intervencións, sobre as 17,25 horas da tarde, os efectivos de bombeiros tiveron que acudir ao Hospital Xeral para retirar unha lona que estaba colocada na fachada e que se desprendeu nunha parte, polo que estaba a ser golpeada polo vento e podía vir abaixo.

Por outra banda, fontes do 112 informaron doutras intervencións na comarca, como a retirada dunha árbore no Corredor de O Morrazo, outro que estaba a cortar a circulación na N-550 en Redondela, e outra que se precipitou á calzada no viario que sobe á Universidade de Vigo, na parroquia de Valadares. Os incidentes, sen maiores consecuencias, repetiuse tamén en varias vías secundarias.