O Concello de Cervo dota de novo equipamento ao Club Tenis de Mesa de San Ciprián

O Concello de Cervo vén de adquirir novo material para o Club Tenis de Mesa de San Ciprián. En concreto, fíxose entrega de vallas para delimitar os campos de xogo co logo do club e o escudo do Concello.

Un material co que o goberno local dá cumprimento a unha demanda da entidade deportiva co obxectivo de mellorar a distribución nos campionatos e torneos como os que vén organizando o club de forma periódica co apoio do Concello.

A administración cervense tamén colabora co club cedéndolle un local municipal na Casa do Mar, onde teñen lugar os adestramentos, co obxectivo de que a entidade dispoña dun espazo fixo para potenciar este deporte, que está en auxe gañando cada vez máis afeccionados.

O Club Tenis de Mesa de San Ciprián leva catro anos funcionando e neste tempo xa organizou diversos campionatos e “conseguiu estender esta disciplina entre os veciños, especialmente entre a xuventude”, tal e como explica o edil de Deportes, Luis Guillén.