publicidade hoxe

FAGAL e a Fundación Barrié inician en Allariz un ciclo de charlas informativas sobre o alzhéimer na provincia de Ourense

PUBLICADO EN: Noticias de GaliciaAllariz
A-
A+

Allariz será a primeira localidade da provincia de Ourense na que terá lugar unha serie de charlas informativas programadas por FAGAL (Federación de Asociacións Galegas de Familiares de Enfermos de Alzhéimer e outras demencias) e a Fundación Barrié, no marco do Programa Red Paraguas Alzheimer. Ao longo dos meses de maio e xuño esta acción formativa continuará por Viana do Bolo, Lobios, A Pobra de Trives, Castro Caldelas e Xinzo de Limia

O Programa Red Paraguas Alzheimer foi creado por ambas entidades en 2013 con fin de: fomentar a capacitación e mellorar a calidade de vida das familias coidadoras de familiares con algunha demencia no rural galego; reforzar a solidaridade entre os membros das familias mediante o achegamento dos máis novos á realidade das persoas maiores; e aliviar a presión das familias coidadoras e axudalas directamente a manterse nos programas de estimulación necesarios para evitar o seu aillamento e a merma da súa calidade de vida. O pasado mes de febreiro FAGAL e a Fundación Barrié renovaron a súa colaboración co obxectivo de ofrecer en 2015 charlas informativas en 24 comarcas rurais galegas.

As charlas programadas, impartidas pola psicóloga de AFAOR, Carmen Pérez, farán un percorrido polas causas que levan a sufrir a demencia, así como os síntomas iniciais que se mostran nas persoas afectadas, como a perda de memoria ou a desorientación. Asi mesmo, a evolución e as etapas da enfermidade tamén serán unha parte importante da actividade, xa que a charla está dirixida tanto a persoas que sofren os efectos de ter un familiar con alzhéimer como aquelas persoas interesadas en coñecer máis sobre esta enfermidade, que se estima que afecta en Galicia a unhas 96.000 persoas.

A primeira charla terá lugar en Allariz o próximo venres, 15 de maio, no Fogar dos Maiores a partir das 18.00 horas. O martes 19 tócalle o turno a Viana do Bolo, concretamente na Casa da Cultura ás 17:30h. A seguinte semana a charla trasládase á localidade de Lobios, o dia 29 ás 17:00h no Edificio Multiusos. Xa no mes de xuño, o martes dia 2 a actividade levarase a cabo na Pobra de Trives, a partir das 17h no Edificio Anexo ao Concello. Unha semana despois, o Castelo de Castro Caldelas será o emprazamento dunha nova charla neste concello, ás 18h. E este percorrido por terras ourensanas remata o dia 12 de xuño no Concello de Xinzo de Limia, máis concretamente no Salón de Plenos do Concello a partir das 17h. Todas estas charlas son abertas ao público e sen inscripción previa.

FAGAL nace en 1998 da man dunha serie de asociacións de familiares de enfermos de alzhéimer e outras demencias que sentiron a necesidade de traballar conxuntamente e unir as súas voces de cara á sociedade galega. Hoxe en día FAGAL está formada por trece asociacións que, con máis de 170 profesionais, prestan diferentes servizos para persoas afectadas de calqueira tipo de demencia e os seus familiares: centros de atención a persoas afectadas pola enfermidade, grupos de axuda, formación, etc. FAGAL está composta por: AFAGA (Vigo), AFACO (Coruña), AFABER (Bergantiños), AFAL-Ferrolterra (Ferrolterra), AGADEA (Santiago), AFAMO (Morrazo), AFAPO (Pontevedra), AFASAL (Salnés), AFALU (Lugo), AFACHAN (Chantada), AFAMON (Monforte), AFAVI (Viveiro), AFAOR (Ourense).

A Fundación Barrié enmarca este programa na actividade da súa área de Acción Social, que prioriza as actividades orientadas a apoiar ás entidades sociais, e ás persoas e familias en situación de necesidade. Galicia e a súa realidade social atópanse moi determinadas polas súas estruturas demográfica e poboacional. O envellecemento da poboación galega ou a dispersión dos núcleos poboacionais condicionan enormemente a organización de servizos de atención de calidade que cheguen a toda a poboación e, por tanto, a estrutura familiar é básica no coidado dos familiares dos enfermos, conlevando un esforzo que merece todo o apoio posible.

12 de maio de 2015 | 13:57 • Sen comentarios

Comentarios pechados.