Carmen Gallego di que non lle cabe na cabeza que se aplique ao alcalde de Caldas de Reis o código ético

A deputada socialista Carmen Gallego avalou este venres o alcalde de Caldas de Reis (Pontevedra), Juan Manuel Rey, e remarcou que non le “cabe na cabeza” que o partido lle aplique o código ético deseñado para casos de corrupción. Preguntada ao respecto en rolda de prensa, a parlamentaria pontevedresa non só defendeu a “inocencia” do rexedor senón que fixo fincapé en que o seu caso “non é de corrupción política”.

“É un problema administrativo que, en calquera caso, está perfectamente solucionado e no que el nin sequera tivo participación”, incidiu, en alusión a que Juan Manuel Rey xa reembolsou ás arcas municipais o importe dunha multa súa que aboara o concello durante o seu período vacacional.

Por iso, opinou que “hai que facer moita pedagoxía” sobre os casos xudiciais e o código ético para “diferenciar” cando un cargo público ten “un problema que non ten que ver coa corrupción política” e cando si garda relación, e se lle aplica o criterio.

Pero no que atinxe ao rexedor caldense, afondou, a imposición das medidas para atallar a corrupción dentro do PSOE implica que o propio partido está a “facer ver” que Rey “ten un problema de corrupción”. “Cando non é así”, sentenciou Galego.

“MERIDIANAMENTE CLARO”

“Está meridianamente claro que non é un caso de corrupción, non cabe ningunha interpretación nese sentido”, resaltou, tras sinalar que é un caso similar ao do alcalde de Camariñas (A Coruña), Manuel Valeriano Alonso de León, quen podería ir a xuízo por permitir a utilización puntual do tanatorio municipal antes de contar con todos os permisos.

Crítica con esta situación, non obstante, a exconselleira de Pesca na etapa do bipartito puntualizou que ela non ocupa actualmente ningún cargo dentro do PSOE, de modo que unicamente pode expresar a súa “opinión”.

Nos últimos días, o secretario xeral do PSdeG, José Ramón Gómez Besteiro, deixou claro en distintas ocasións que “ningún socialista sentará no banco dos acusados ostentando a condición de socialista” e, neste escenario, o alcalde de Caldas xa comezou a recoller sinaturas para presentarse aos comicios locais baixo unha agrupación de electores por se é suspendido de militancia.