The National tocarán en Santiago o 30 de abril no seu primeiro concerto en Galicia

Os estadounidenses The National tocarán en Santiago o próximo 30 de abril no que será o seu primeiro concerto en Galicia, na praza da Quintana, dentro do festival ‘Lapso 2015 Musical Experience’. A cita, anunciada este luns polos promotores e o Concello compostelano, contará tamén coas actuacións de Best Boy e The Gift.

O ‘Lapso 2015 Musical Experience’ nace coa aspiración de converterse nunha nova cita “de referencia no panorama español da música en directo”, segundo destacaron en rolda de prensa os responsables do evento.

A formación de Cincinatti encabeza un cartel que se enmarca no ciclo ‘Compostela Rock’ e que promete unha gran xornada, segundo resaltaron en rolda de prensa a concelleira de cultura, María Antón; o xerente do Auditorio de Galicia, José Víctor Carou; Pedro Martínez, da axencia Legal Music e Carlos Montilla, director da promotora I-Radia Crea.

Ademais de The National, sobre o escenario pasarán os portugueses The Gift e os galegos Best Boy. As entradas pódense comprar no Teatro Principal de Santiago, na Reixa Tenda, en ticketea.com, entradas.abanca.com e ataquilla.com.

As primeiras 500 en ticketea.com contan cunha promoción especial pola que custan 25 euros máis gastos. A partir desa cifra e no resto de canles o prezo será a partir de 28 euros máis gastos.

‘LAPSO 2015’

O ‘LAPSO’ celébrase por primeira vez en 2015 e xorde da colaboración da promotora local I-Radia Crea e da axencia Legal Music, coa vocación de promover un encontro anual para a mellor música internacional do momento no noroeste peninsular.

A intención, segundo informaron os promotores, é que en futuras ocasións poidan ser outras urbes as candidatas a acoller este encontro, que este ano arrancará o día 30 ás 19,30 horas coa apertura de portas e ás 20,00 horas co primeiro concerto, a cargo de Best Boy. Ás 21,00 horas será a quenda de The Gift e The National tocarán a partir das 22,30 horas.

PRIMEIRA VEZ EN GALICIA

A banda liderada por Matt Berninger chega á capital galega despois de seis discos, polo que os organizadores destacan que é un concerto “moi esperado” polos seus seguidores de todo o noroeste peninsulsar.

A inconfundible voz de Berninger, xunto cos xemelgos Dessner ás guitarras e os irmáns Devendorf en baixo e batería presentarán ao público o seu último álbum ‘Trouble Will Find Me’.

Lanzado en 2013, os de Cincinatti superan o reto que se lles puxo diante tras o éxito de ‘High Violet’ (2010), o seu quinto longo, co que deron o salto nos auditorios dos seus concertos.

Recibiron a nominación aos ‘Grammys 2014’ como mellor álbum de música e a súa presenza foi requirida en festivais internacionais, así como a súa colaboración en bandas sonoras de series de televisión e cinema.

THE GIFT E BEST BOY

O cartel complétase cos portugueses The Gift, que regresa a Compostela co seu intenso directo e temas marcados polo próximo; e Best Boy, cualificados como “artesáns da canción”, que contan cunhas melodías de son claro e coidado.

Este proxecto musical naceu en Tui (Pontevedra) en 2014 no dúoformado por Ángel Sánchez e Lucas Fernández. Malia que o seu estilo se aproxima ao folk americano, a variedade das súas composicións e ritmos fai que se mova con soltura por un abano de matices.