O alcalde de Ponteareas asegura que os dous incendios forestais foron intencionados

O alcalde de Ponteareas (Pontevedra), Salvador González Solla, asegurou este martes que os dous incendios forestais rexistrados nas parroquias de Padróns e Ribadetea, que continúan activos e xa superaron en conxunto as 150 hectáreas de superficie, foron “puramente intencionados”.

En declaracións, o rexedor manifestou que estes lumes son “unha desgracia” para a localidade e comentou que, aínda que nalgún momento no barrio de Mouro, en Padróns, as lapas chegaron a estar a “50 ou 60 metros” das casas, non houbo que desaloxar os veciños e as vivendas non se están a ver afectadas.

Segundo comunicou, tan só a pasada fin de semana a localidade xa rexistrou “máis de seis ou sete incendios, sobre todo na parroquia de Guláns”, onde, indicou, aínda que este martes non houbo lume, si que houbo varios focos que non chegaron a prender, polo que están a vixiar a zona.

“Van queimando por distintos sitios, non sei se son unha cuadrilla, ou non sei”, comentou González Solla antes de sinalar que, independentemente de quen sexa o autor ou autores, “se vai que é puramente intencionado”.

A Consellería de Medio Rural e do Mar comunicou, que a última hora da mañá deste martes continuaban activos os dous lumes e había unha superficie afectada de 150 hectáreas entre as dúas parroquias.

Nos labores de extinción do lume de Padróns -que se iniciou ás 22,29 horas do luns- participan 8 helicópteros, un técnico, 3 axentes forestais, 16 brigadas, 9 motobombas e 3 pas. Ademais, en Ribadetea -onde as lapas empezaron ás 4,03 horas deste martes- traballan 4 axentes, 3 brigadas e 2 motobombas. Así mesmo, tamén colaboran efectivos de Bombeiros de Ponteareas.