Noriega acusa a Feijóo de usar a Xunta para apuntalar a Agustín Hernández

O alcalde de Teo e aspirante ao bastón de mando de Santiago por Compostela Aberta, Martiño Noriega, considerou este martes “unha broma de mal gusto” que o presidente da Xunta e xefe de filas do PPdeG, Alberto Núñez Feijóo, defina o actual rexedor da capital galega, Agustín Hernández, como un representante da “nova política”. Ademais, acusoulle de “utilizar” o Executivo que lidera para “apuntalar a desvergonza” instaurada polo seu partido na cidade.

Nunha comparecencia ante os medios para presentar o primeiro tramo da candidatura que o acompañará nas eleccións municipais, Noriega recordou que o PP tivo “tres alcaldes en catro anos” e que actualmente gobernan persoas que “non pasaron polas urnas” tras a “condena por prevaricación” que inhabilitou sete edís populares. “Se todo iso Feijóo o define como nova política, non deixa de ser unha broma de mal gusto”, sentenciou.

Ademais, xulgou Noriega que esas afirmacións do mandatario autonómico denotan “nerviosismo” e revelan o seu interese por “seguir mantendo a calquera custo, mesmo de credibilidade, a súa influencia nunha administración moi simbólica” como é a Casa do concello de Santiago.

“Somos consciente de que o PP está a poñer o posible e o imposible por defender a indecencia na cidade, mesmo coa utilización partidista das administracións”, remachou o primeiro edil de Teo, pero expresou a súa “confianza” en que a sociedade compostelana xa comprobou “os resultados” de deixar o Pazo de Raxoi en mans do PP. Neste punto, advertiu a Feijóo de que “non é válido” dicir que Hernández “pasaba por aí e nada ten que ver co anterior”.

E, fronte á “situación de vergoña allea” provocada polo PP, reivindicou que a pretensión de Compostela Aberta non é “apuntalar unha casa en ruinas”, senón abandonar “vellas dinámicas” e instaurar unha etapa de “participación, transparencia e rendición de contas” na que poñan en marcha “mecanismos de implicación da cidade na xestión do público, do ben común”.

“NON NOS IMOS CONFUNDIR DE INIMIGO”

Cuestionado sobre a súa política de alianzas tras os comicios, reiterou que a decidirá Compostela Aberta “de xeito participativo” e “absolutamente horizontal”, pero deixou claro que a súa pretensión é “non favorecer que se volva reproducir un goberno como o destes catro anos” por entender que foi “nocivo” para a cidade.

Neste sentido, instou o resto de forzas da oposición a “clarificar” a súa postura ao respecto e a “deixar de facerse trampas ao solitario”. Tras admitir que lle causaron “sorpresa” algúns comentarios destes grupos, Noriega preferiu centrarse “no obxectivo principal”, que é “cambiar a cidade”. “Non nos imos confundir de inimigo”, resolveu.

Volvendo sobre os pactos, insistiu en que Compostela Aberta ten “vocación maioritaria”. Ademais, aseverou que percibe “retorno cidadán, ilusión” e que a plataforma que encabeza pode “ser o motor do cambio de Santiago” os próximos anos. “E que hai vontade de pasar páxina dun goberno baseado na indecencia e a irresponsabilidade”, apostilou.

Con todo, á vista do resultado das eleccións andaluzas, o covoceiro de ANova admitiu que non se poden “menosprezar os poderes fácticos”, como “o bipartidismo” e as súas “influencias e estratexias”. “Santiago é un exemplo de como eses poderes fácticos, malia os estragos que fixeron, se aferran a manter o seu statu quo”, comparou.

“ABSOLUTAMENTE PREPARADOS”

Precisamente nese escenario enmarcou a creación de Compostela Aberta, que describiu como un grupo de persoas que pretenden “achegar a un novo tempo político plural, diverso” e formar un goberno “ao servizo da xente e non ao revés”.

“Queremos mandar unha mensaxe de esperanza: se alguén apagou as luces a esta cidade, aquí hai xente disposta a volver acendelas”, manifestou, para enxalzar que conta cun “equipo de garantías” e “preparado para asumir o reto” de liderar a capital galega.

Trátase, detallou, de “xente preparada, representativa, de diferentes profesións e coñecementos e que demanda un cambio activo”; e apuntou que se está a ultimar o programa electoral. O resto da candidatura decidirase nunha asemblea o próximo 7 de abril.

“PARTICIPACIÓN”

En canto ao proceso de selección dos 15 primeiros integrantes da candidatura, destacou que foi “absolutamente impecable”, tanto pola participación coma polas “nulas incidencias”. “Estou orgulloso de formar parte”, proclamou.

Pola súa banda, o voceiro da comisión electoral de Compostela Aberta, Javier Vázquez, indicou que máis de 1.000 persoas participaron na elección, de modo que se “superaron as expectativas”.

Tras resaltar a “ilusión” que motivou na cidadanía, contrapuxo este modelo co “dedo máxico” que utiliza o PP e que permitiu que Gerardo Conde Roa, condenado a dous anos de cárcere, chegase a alcalde de Santiago.

OS CANDIDATOS

Os cinco primeiros postos da candidatura de Compostela Aberta estarán ocupados por membros da lista ‘Gañemos Compostela’, que impulsou Martiño Noriega. Séguenlle María Rozas, Jorge Duarte, Branca Novoneyra e Xan Duro nos cinco primeiros postos.

Seguidamente, sitúanse Cuncha Fernández (Gañar Compostela), Manolo Deus, Marta Lois (Gañar Compostela), Rafa Pena (Gañar Compostela), Noa Morales (Gañar Compostela), Bautista Vega (Gañar Compostela), María Isabel Porta ‘Mabela’ (independente e procedente de Podemos), Miguel Penas, Mari Luz López Pardal (independente tamén procedente de Podemos) e Manuel López Gómez ‘Akin’ (independente procedente de Podemos).

PERFÍS

Martiño Noriega é médico de familia e traballou no 061. Actualmente é covoceiro de Anova e permanecerá ata o final da lexislatura como alcalde de Teo, onde completará o seu segundo mandato.

Pola súa banda, María Rozas é consultora de xestión económica e patrimonial para administracións públicas e traballa para unha empresa de tecnoloxía da información e da comunicación; mentres que Jorge Duarte, quen foi presidente do Colexio de Arquitectos de Santiago e decano do de Galicia, está especializado en Urbanismo e Rehabilitación e Renovación Urbana.

Branca Novoneyra é xestora cultural e autora de libros de poesía. É Licenciada en Ciencias Políticas e diplomada de estudios avanzados en Educación Artística. Xan Duro foi presidente de Adega e coordinador xeral de Verdegaia, traballa na USC como auxiliar técnico de biblioteca e procede de Espazo Ecosocialista.