Martiño Noriega salta á política municipal de Santiago como candidato á plataforma cidadá Compostela Aberta

Martiño Noriega

Martiño Noriega, alcalde de Teo e covoceiro nacional de Anova, deu o salto á política municipal de Santiago e postúlase para ser candidato da plataforma cidadá Compostela Aberta, que abriu un proceso de primarias para elixir o cabeza de lista para as eleccións de maio.

É o único candidato á Alcaldía e faino baixo a lista ‘Gañar Compostela’, paraugas no que tamén o fan, pero para conformar candidatura municipal, nomes como Jorge Duarte e Xan Duro, e outra decena de persoas.

De forma independente, fano outras persoas como Cristina Amor, que tamén está vinculada a Anova, a organización que colidera Noriega xunto a Xosé Manuel Beiras. En total, hai 24 persoas para formar parte da lista das municipais, co que previsiblemente poderán ir todos nela, xa que a candidatura de Santiago se conforma con 25 nomes.

O político nacionalista, que está chamado a suceder a Xosé Manuel Beiras, con quen comparte liderado en Anova, non explicará ata este xoves a decisión adoptada, segundo el mesmo trasladou.

Aínda que nas últimas semanas se especulara xa con que presentaría a súa candidatura a este proceso, Noriega procurou afastarse dos micrófonos e apurou ata o último día para dar o si definitivo, decisión que o seu ámbito político xa daba por feito nos últimos días.

Cando Noriega fixo público que non volvería presentarse á Alcaldía de Teo comezaron as especulacións sobre o seu salto á capital galega, que é lindante ao municipio no que actualmente goberna. No municipio teense gañou as últimas eleccións por maioría absoluta, aínda que baixo as siglas do BNG, organización da que se escindiu xunto aos militantes vinculados aos ‘irmandiños’ en 2012.

Non obstante, tanto publicamente, como de forma privada, el negou que tivese intencións de presentarse en Santiago sempre que se lle preguntou e, mesmo, segundo as fontes consultadas, tiña outros plans políticos a medio prazo, que agora quedan en suspenso.

De feito, o seu futuro político nunhas eleccións xerais ou autonómicas queda estreitamente condicionado ao resultado electoral, posto que cando se lle presentou a ocasión de deixar Teo para acceder á Cámara galega, na candidatura de AGE, el optou por manter o seu compromiso local.

ROLDA DE CONTACTOS

Co nacemento de Compostela Aberta, e o sentimento de algúns dos seus integrantes de que era necesario un “referente” político para evitar que o PPdeG se fixese de novo coa Alcaldía, Martiño Noriega optou por abrir unha rolda de contactos coas diferentes sensibilidades que poderían apoiar esta candidatura cidadá.

Así, o político nacionalista postúlase coa intención de que Agustín Hernández, terceiro rexedor no que vai de mandato na capital galega tras as renuncias de Gerardo Conde Roa e Ángel Currás, non volva repetir á fronte do Concello compostelano.

A fórmula na que se concorrerá aínda está por determinar, se ben a Coordinadora de Anova aprobou a creación dunha “coalición instrumental” para que as plataformas cidadás poidan sumar estas siglas e, desta forma, acceder ás deputacións provinciais. Este interese, segundo explicou esta formación, está vinculada á última reforma da administración local e o peso que teñen estas institucións sobre os concellos.

Por outro lado, Podemos de Santiago de Compostela votou, en referendo interno, apoiar nas municipais a candidatura cidadá en torno a Compostela Aberta, pero renunciou a presentar candidatos a este proceso interno e, de feito, prohibiu usar o seu nome para calquera persoa que pretendese postularse.