Ferrol pon en marcha unha campaña de corresponsabilidade doméstica con motivo do Día da Muller

A Concellería de Igualdade e Xuventude do Concello de Ferrol, que dirixe Verónica Casal Míguez, desenvolve hoxe e mañá unha campaña para a eliminación de estereotipos e o fomento da corresponsabilidade no fogar. Así, ao longo desta mañá e na xornada do sábado entreganse as persoas que compran nos mercados municipais -A Magdalena, Recimil e Caranza- bolsas ecolóxicas, mandís e ambientadores coa lenda da iniciativa “A casa, cousa de todos”. Un total de 1.000 unidades destes produtos serán distribuídos por varias persoas formadas en materia de Igualdade para concienciar sobre o reparto equitativo das responsabilidades domésticas de todos os membros da unidade familiar.

“A finalidade desta campaña é transmitir a mensaxe de que os labores domésticos son responsabilidade de todos os membros da unidade familiar, polo que o reparto de tarefas ten que ser equitativo”, indicou a edil de Igualdade e Xuventude. Esta iniciativa enmárcase na conmemoración do Día Internacional da Muller, cuxos actos institucionais terán lugar este domingo, día 8 de marzo, no Teatro Jofre a partir das 19.00 horas.

O alcalde de Ferrol, Jose Manuel Rey Varela, presidirá esta conmemoración en que se homenaxeará á primeira muller presidenta da Coordinaria de Confrarías da Semana Santa Ferrolá, María del Carmen Arcos Gómez. Ademais deste recoñecemento, proxectarase o documental sobre Emilia Pardo Bazán “La condesa rebelde”. Dende o Concello de Ferrol destácase a importante labor da homenaxeada na ruptura de estereotipos como pioneira na incorporación da muller ás procesións da Semana Santa Ferrolá, sendo as mulleres ferrolás as primeiras portadoras de tronos en España a finais dos anos sesenta.