Veducido acolle o Campionato Galego de Piragüismo de inverno sobre a distancia de 5.000 metros

O próximo sábado disputarase o Campionato Galego de Piragüismo de inverno sobre a distancia de 5.000 metros. Na proba participarán case 600 padexeiros de todas as categorías nas modalidades de kaiak e canoa, tanto masculino coma feminino. Será a primeira competición oficial da nova tempada. Xa se disputaron dúas regatas amigables.

Os padexeiros cadetes, xuvenís, sénior e veteranos competirán a partir das nove e media da mañá nunha xornada que finalizará sobre as tres da tarde. Haberá un total de trece saídas, incluíndo as regatas de veteranos.

O número de clubs representados será de 42. O Kayak Tudense é o que máis padexeiros achegará á competición cun un total de 33 inscritos. O Cidade de Pontevedra terá a 31, mentres o Rías Baixas Poio e o Ría de Aldán contarán con 28 cada un. O Naval de Pontevedra presentarase con 26 padexeiros. O Vilaboa e Náutico de Pontecesures terán a 24 representantes na liña de saída.

O Campionato Galego de inverno marca o inicio oficial dunha tempada que se presenta intensa en canto ao número de regatas que se realizarán. Unha das principais novidades será o novo sistema de puntuación nas ligas nas distintas modalidades. Á marxe do calendario galego, na comunidade tamén se disputarán diversas probas nacionais, como o Campionato de España de verán, a Copa de España de 200 e 500 metros e o Campionato de España de maratón