O comité de Povisa irá a por todas tras os últimos despedimentos

O comité de empresa de Povisa advertiu este venres de que os traballadores irán “a por todas” para deter a “sangría” que, na súa opinión, a dirección do hospital está a levar a cabo no equipo, despois de anunciar 13 despedimentos e reorganización de xornada para outros 23 empregados.

A empresa, que hai unha semana comunicou que retiraba o ERE de extinción que pretendía aplicar e que supoñía 56 despedimentos, comunicou o comité este venres que despedirá 10 celadores e tres empregados do arquivo clínico, e que modificará a quenda doutros 16 celadores e sete auxiliares. Todo iso, dentro das accións da empresa para conter gasto e “mellorar a eficiencia”.

Ante esta noticia, celebrouse unha asemblea urxente ás portas do hospital, onde a presidenta do comité recoñeceu que este anuncio era “algo que os traballadores xa se temían, porque sabían que, unha vez retirado o ERE, a empresa ía seguir facendo das súas”.

“É o que estivo a facer nos últimos cinco anos, sen que ninguén diga nada: o Sergas, a Xunta, o PP, Inspección, ata os xulgados… todos miran para outro lado, todo o mundo lava as mans”, lamentou.

FOLGA

Así as cousas, e ante a “indignación” do equipo, Chus Neira explicou que o próximo luns celebrarán unha asemblea, na que se decidirán medidas de presión e mobilizacións. “Eu, como voceiro da CIG, son partidaria de ira á folga. Hai que espertar, non podemos seguir así, vimos angustiados a traballar”, subliñou, e recordou que a dirección do hospital “se nega” a negociar o novo convenio colectivo.

A presidenta do comité indicou que as pretensións de Povisa non só incumpren a Lei de Sanidade Pública ou as condicións do concerto co Sergas, senón que, ademais, “repercute na calidade da asistencia aos pacientes”.

A ese respecto, denunciou que, cos novos despedimentos, quedarán só 24 celadores no hospital (solo tres na quenda de noite). “Todo isto vai levar a que un día pase algo realmente grave. Entón levarán as mans á cabeza”, advertiu Neira.