Sober convoca un certame de debuxo infantil para escolares da Comarca de Lemos

O Goberno local do Concello de Sober vén de por en marcha o I Certame de debuxo infantil Feira do Viño de Amandi 2015 coa finalidade de elaborar un adhesivo co traballo gañador.

No concurso poden participar todos os nenos e nenas da Comarca de Lemos con idades comprendidas entre os 6 e os 12 anos. Cada participante pode presentar un único traballo que acompañará dun folio no que deben figurar os seus datos persoais.

Os debuxos deberán presentarse sobre cartolina en tamaño aproximado DIN A4 e o tema debe ser O cultivo da vida na Ribeira Sacra. Os traballos poden entregarse ata o día 27 de febreiro na Biblioteca Pública do Concello de Sober.

O xurado, formado por persoas entendidas na materia, seleccionará ao gañador, quen recibirá un premio o 29 de marzo, tras a lectura do pregón da XXXV Feira do Viño de Amandi.

O alcalde de Sober, Luis Fernández Guitián, anima a todos e todas os escolares da Comarca a participar neste certame para que os seus debuxos poidan “ter un eco internacional” a través do adhesivo que imprimirá o Concello e que será entregado na Feira.