O departamento de Xuventude de Santiago organiza un campamento de iniciación ao esquí en Leitariegos

A concelleira de Xuventude, Maite Cancelo, presentou a segunda edición do campamento de iniciación ao esquí Imos á neve, que se desenvolverá do 15 ao 17 de febreiro en Leitariegos (León). Vinte mozos e mozas de 14 a 20 anos poderán participar neste programa. Ata o 6 de febreiro estará aberto o prazo de inscrición neste campamento, que pretende fomentar un lecer saudable, na liña doutros programas postos en marcha pola Concellería de Xuventude. O Departamento financia parte do prezo desta actividade, que terá un custo para os participantes de 120 euros, nos que se inclúe o transporte, o aloxamento, as comidas, as clases e todos os materiais necesarios.

Os interesados deben entregar o impreso correspondente, debidamente cuberto, no Rexistro Xeral (rúa Presidente Salvador Allende) ou no Rexistro Auxiliar do Centro Sociocultural e Xuvenil Municipal do Ensanche (rúa Frei Rosendo Salvado, 14-16), en horario laboral de 9:00 a 14:00 horas. As prazas serán cubertas por rigoroso orde de inscrición.

Os participantes partirán de Santiago na mañá do 15 de febreiro. Chegarán a Villablino e alí realizarán xogos pola cidade, probarán o equipamento e coñecerán as normas básicas da estación. Na segunda xornada xa terán clases de esquí e esquí libre. Tras unhas horas máis de esquí, a expedición sairá de volta cara Compostela na tarde do 17 de febreiro.