publicidade hoxe
Publicidade
omeulibro1

Convócanse 30 novos permisos de explotación para marisqueo a pé na confraría de Ferrol e outros 3 na de Cariño

PUBLICADO EN: Noticias de GaliciaCariñoFerrol
A-
A+

A Consellería do Medio Rural e do Mar convoca 30 novos permisos de explotación para marisqueo a pé na confraría de pescadores de Ferrol e outros 3 para a confraría de Cariño. A Consellería convoca estas prazas logo de que ambas confrarías solicitasen a súa convocatoria, seguindo o procedemento que recolle a normativa en vigor.

Estas novas incorporacións son unha mostra máis da aposta da Xunta pola xeración de actividade e o incremento dos postos de traballo para a incorporación de xente nova ao marisqueo, especialmente no contexto económico actual.

Para poder optar aos permisos de explotación, os solicitantes deben cumprir, entre outros, os requisitos esixidos no Decreto 425/1993, do 17 de decembro, polo que se regulan os permisos de explotación para exercer a actividade pesqueira e marisqueira e presentar a documentación requirida pola Consellería do Medio Rural e do Mar. As solicitudes serán estudadas e baremadas, segundo recolle a Resolución do 12 de novembro de 2013 da Dirección Xeral de Desenvolvemento Pesqueiro pola que se aproba o baremo para obter o permiso de explotación para o marisqueo a pé. Este baremo é común a todas as confrarías e foi publicado no Diario Oficial de Galicia do 21 de novembro de 2013.

O prazo de presentación de solicitudes será de 15 días hábiles dende mañá, tras a publicación desta convocatoria no taboleiro de anuncios da Xefatura Territorial e na páxina web da Consellería.

As solicitudes presentaranse nas oficinas de rexistro da Xunta de Galicia, oficinas de correos ou no resto de lugares indicados na Lei de réxime xurídico das administracións públicas e do procedemento administrativo común. Unha vez rematado o prazo de solicitude, a Consellería do Medio Rural e do Mar procederá á súa valoración.

Cabe lembrar que todas as prazas se convocan despois de comprobar a súa viabilidade nos informes técnicos e sempre tendo en conta a compatibilidade e sustentabilidade dos recursos e criterios socieconómicos.

27 de xaneiro de 2015 | 16:41 • Sen comentarios

Comentarios pechados.