A D.O. Monterrei incrementa a súa cota de exportación

Os datos da última campaña 2013-2014, mostran un notable incremento das cotas de exportación das adegas da Denominación de Orixe Monterrei, que actualmente supoñen o 17,1% do viño comercializado baixo este selo de garantía.

O mercado de exportación incrementa o seu valor económico así como o seu peso porcentual nas cifras absolutas das vendas das adegas de Monterrei. Cun total de 253.222 botellas destinadas a exportación, imponse a Unión Europea co 76% desta cota, sendo o principal mercado Reino Unido co 48,5% do volume total de viño comercializado fóra de España pola D.O.

A unha distancia razoable de Reino Unido, con aproximadamente o 20% da cota de exportación, encóntrase Alemaña. Fóra da Unión Europea, EUA e Xapón representan os principais mercados, con volumes que ascenden respectivamente ao 12,6% e 4,05% do viño destinado a comercio exterior.

Un total de 22 países figuran entre os mercados do Viño de Monterrei, gañando ano tras ano peso relativo nas vendas da Denominación de Orixe.