Amplo dispositivo de busca dos tres mariñeiros do ‘Paquito II’ desaparecidos

O dispositivo de busca do barco bateeiro e os seus tres mariñeiros desaparecidos prosegue este mércores con medios por terra, mar e aire na zona de Corrubedo, no municipio coruñés de Riveira.

Segundo informaron fontes de Salvamento Marítimo, durante toda a noite permaneceu no lugar o buque ‘Don Inda’ e dende primeira hora da mañá deste mércores están no lugar tamén as embarcacións ‘Salvamar Regulus’ e ‘Salvamar Sargadelos’, así como o avión ‘Sasemar 102’, con base en Santiago, e o helicóptero ‘Helimer 215’.

Ademais, está previsto que se vaian sumando ao operativo de rastrexo as patrulleiras da Guardia Civil ‘Tabarca’ e ‘Andaratx’; ademais do buque ‘Sebastián de Ocampo’ da Xunta. Salvamento precisou que os medios aéreos se “irán relevando”, polo que está previsto que colabore na busca o helicóptero ‘Pesca 1’.

Tamén está previsto que se despracen á zona os mergulladores da Guardia Civil (GEAS) e de Salvamento da base estratéxica de Fene (A Coruña) para valorar se poden facer inmersións. Mentres, por terra, participan efectivos de Protección Civil.

ALERTA

Salvamento recibiu ás 16,55 horas do martes o aviso dun particular de que non podía contactar co barco bateeiro ‘Paquito II’, que saíra de Cabo de Cruz, en Boiro, onde ten o porto base, cara a Muros, e o último contacto producírase ás 14,00 horas.

Os tres mariñeiros desaparecidos son naturais de Boiro e un de eles, o patrón do bateeiro, é ademais exconcelleiro do PP. Trátase en concreto de Germán Fernández Triñanes, de 52 anos, e os tripulantes Santiago B.T. e Juan H.T., de 47 e 37 anos, respectivamente.

Na zona localizáronse o martes obxectos persoais dos mariñeiros desaparecidos, a botica de primeiros auxilios do bateeiro e unha mancha que aparentemente de gasóleo.