A Escola de Música da Agrupación Musical de Goián ofreceu en Tomiño a súa audición de Nadal
A Escola Municipal de Música, celebrou a súa Audición de Nadal o venres pasado nas instalacións do Centro Goianés.
Na oportunidade, o alumnado interpretou diferentes pezas musicais nas especialidades impartidas: dende os máis pequenos, que asisten a Xardín Musical; Música e Movemento, ata os que estudan algunha das especialidades instrumentais (frauta, óboe, fagot, clarinete, saxofón, trompa, trompeta, trombón, bombardino, tuba, violoncello, percusión e instrumentos tradicionais galegos).
Entre os alumnos e alumnas atopábanse tamén os once novos compoñentes da banda da Agrupación Musical de Goián, que fixeran o seu debut no Concerto de Santa Cecilia.
A Agrupación Musical de Goián, dirixida por José Bugallo Senra, conta na actualidade con máis de 120 compoñentes de diferentes idades; ten unha ducia de profesores que imparten clases de vento-madeira, vento-metal, percusión e violonchelo a máis de 70 persoas; e ten dúas bandas de música: adultos (uns 45 compoñentes) e infantil (uns 25).
A banda ofrecerá o vindeiro domingo, 21 de decembro, o tradicional Concerto de Nadal, na Igrexa Parroquial de Goián, ás 18.00 horas.