A Coruña acollerá o 18 de decembro unha xornada formativa con clubs e asociacións deportivas

Presentación de Sportis Solidario

O concelleiro de Deportes, Francisco Mourelo, recibiu esta mañá a responsables de Sportis. Formación Deportiva e o Departamento de Didácticas Específicas da Universidade da Coruña (UDC), que organiza un novo proxecto solidario denominado II Forma Sportis Solidario. III Xornadas Nacionais de Nutrición, Exercicio Físico e Saúde.

O evento celebrarase o 18 de decembro na Facultade de Ciencias da Educación co obxectivo, por unha banda, de mellorar a formación dos directivos e técnicos que están á fronte de clubs e asociacións deportivas da Coruña, así como docentes de Educación Física, e estudantes da Universidade e Formación Profesional vinculados ás áreas de ciencias do deporte, nutrición e saúde; e, polo outro, recadar xoguetes para repartir entre familias galegas que teñan dificultade para comprarllos aos seus fillos.

O concelleiro de Deportes destacou que a celebración deste proxecto avanza no compromiso deste equipo de goberno de divulgar o espírito solidario que se pode fomentar a través do deporte. As Xornadas Forma Sportis Solidario acollerán un total de 8 conferencias impartidas por profesionais de recoñecido prestixio que abordarán numerosas temáticas vinculadas ao ámbito das Ciencias do Deporte e especialmente á nutrición no deporte.

A matrícula será gratuíta e o único requisito é que o participante doe á organización a cantidade dun mínimo dun xoguete novo. De feito, os xoguetes serán doados a familias ou asociacións con familias sen recursos económicos. Todos os participantes recibirán un certificado de asistencia ás xornadas formativas. Existe un aforamento de 400 prazas que se outorgarán por rigorosa orde de inscrición.Todos os participantes deberán formalizar a súa inscrición para obter o diploma de asistencia -é necesario asistir polo menos ao 80% das conferencias das xornadas-. O prazo de inscrición mantense aberto até o vindeiro luns, 15 de decembro.