Os rexedores de Culleredo e Oroso disputaranse a secretaría provincial do PSOE da Coruña

Os alcaldes de Culleredo e Oroso, Julio Sancristán e Manuel Mirás Franqueira, disputaranse a secretaría provincial do PSOE da Coruña nas primarias que terán lugar o próximo día 30.

Así o indicaron fontes do partido, despois de que ao longo desta mañá se verificasen e recontasen os avais depositados por ambos os dous para concorrer a este proceso orgánico, que requiría o respaldo de polo menos 867 militantes.

En concreto, Sacristán achegou 1.046 sinaturas válidas, mentres que Mirás Franqueira sumou 979 apoios de afiliados socialistas de toda a provincia.

Pola súa parte, no que atinxe aos outros dous aspirantes a relevar a Francisco Caamaño á fronte do PSOE coruñés, o rexedor de Ares, Julio Iglesias, unicamente achegou 606 avais e Celso Posada recibiu oito respaldos. O quinto aspirante en liza, o exconcelleiro de Teo Jano Leis, xa comunicara a pasada fin de semana a súa retirada do proceso.

Con todo, estes datos aínda teñen carácter provisional, xa que os próximos tres días se deron de prazo para estudar eventuais queixas ou reclamacións. Así as cousas, os candidatos non serán proclamados definitivamente ata o sábado.

IGREXAS RECLAMARÁ

Polo momento, dende a candidatura de Julio Iglesias xa avanzou as que serán as súas primeiras queixas.

Ademais de detectar “incidencias” nos censos – con presenza de persoas que non forman parte da organización – , tamén denuncian “interferencias” de dirixentes do partido que se”deberían manter imparciais”.

Iglesias xa deixara patente o luns a través das redes sociais que unicamente recadara uns 700 avais tras unha campaña “impecable e limpa” e malia a “presión brutal” á que estivo sometido ao longo do proceso.

PROCESO EN MARCHA

En canto ás primarias, os alcaldes de Culleredo e Oroso estaban considerados dende o inicio os ‘favoritos’, pois ambos os dous contan cunha dilatada bagaxe municipal e o respaldo de amplos sectores da organización.

Se ben o primeiro contaría co apoio do exministro de Xustiza e o seu ámbito, o segundo gozaría do visto bo de parte da dirección galega do partido -na que ten asento- e de boa parte dos ata agora críticos na provincia.

E, aínda que distintos socialistas consultados dan por feito que os que apostaban polo primeiro edil de Ares apoiarán agora ao rexedor orosino, no ámbito de Igrexas négano e unicamente sinalan que agora “escoitarán” as propostas dos dous candidatos.