publicidade hoxe
Publicidade
omeulibro1

O presidente da Xunta ve con tranquilidade o proceso polo castelo de Monterrei

PUBLICADO EN: Noticias de GaliciaLocal PortadaMonterreiOurense
A-
A+
Europa Press

O presidente da Xunta, Alberto Núñez Feijóo, dixo que observa con “tranquilidade” a tramitación da denuncia presentada por dous colectivos defensores do castelo de Monterrei na Audiencia Nacional, e engadiu que se alegra de que a xustiza aclare que todo é legal, en relación ás obras de rehabilitación financiadas pola Xunta.

A denuncia dos referidos colectivos foi presentada contra a ampliación dos usos previstos para a fortaleza situada na bisbarra de Verín-Monterrei, ditada polo Ministerio de Hacienda e Administracións Públicas en xullo de 2014. Esa resolución ministerial engadiu o uso hoteleiro aos previstos no documento de cesión do castelo á Xunta de Galicia en 2008.

“Alégrome de que a xustiza veña a aclarar que o que faise aí é sempre conforme á lei e aos decretos de transferencia e por iso o Ministerio de Hacienda e Xunta de Galicia traballan agora para acreditar que o único que queremos facer é poñer esa fortaleza en valor e que siga sendo de uso público”, afirmou Feijóo a preguntas dos medios nun acto no Carballiño (Ourense).

O mandatario autonómico agregou que o Ministerio de Hacienda, a petición da Audiencia Nacional, “ten que acreditar esa documentación” relativa á resolución de ampliación de usos e subliñou que todo “o solicitado á Xunta, darase e estase a dar”, pois é “lóxico” que a xustiza pida documentación ao actuar “a instancias” do denunciante.

“Paréceme ben que se actúe para que a xustiza deixe claro que esa fortaleza segue sendo patrimonio público, da Xunta de Galicia, e polo tanto de todos os galegos, e que se pode compatibilizar o uso de parador nunha parte, co público na súa totalidade,” argumentou.

O presidente da Xunta subliñou a intención de rehabilitar o castelo “para poñelo en valor para Galicia e para Ourense, e facer o que non se fixo antes”, pois había unha fortaleza “en estado moi lamentable” dende o punto de vista da conservación do patrimonio. Así, defendeu que agora se quere conservar, poñela en valor e a “disposición de todos”.

EVOLUCIÓN DOS FEITOS

A fortaleza de Monterrei foi cedida á Xunta de Galicia polo prezo simbólico dun euro en 2008, cunha resolución estatal que contemplaba usos relacionados coa promoción económica e difusión de sectores como o viño e a moda, entre outros.

Un proxecto de rehabilitación da Xunta de Galicia iniciou as obras denunciadas pola plataforma en defensa do castelo de Monterrei e polo Foro de Monterrei, en relación a danos na fortaleza ocasionados por maquinaria e operarios.

Tamén impugnaron as dúas licenzas de obra concedidas en maio de 2014 polo Concello de Monterrei á Axencia de Turismo de Galicia, promotora da rehabilitación. Esa impugnación foi admitida a trámite no xulgado contencioso-administrativo número 2 de Ourense o 31 de outubro de 2014.

Uns días antes, a Audiencia Nacional, na súa sala do contencioso-administrativo número 7, admitiu a trámite o recurso de ambos os dous colectivos contra a resolución de xullo de 2014 na que o Ministerio de Hacienda ampliou os usos autorizados na fortaleza para incluír o de adaptar o castelo a Parador Nacional, malia que se sitúa a poucos metros do recén pechado parador de Monterrei.

18 de novembro de 2014 | 18:09 • Sen comentarios

Comentarios pechados.