O multiusos de Arcade acolle o tradicional concerto de Santa Cecilia este domingo

Coa intención de ampliar a oferta cultural de Soutomaior, o auditorio do edificio Multiusos de Arcade acollerá este domingo por terceiro ano consecutivo o tradicional concerto en honra de Santa Cecilia. O recital dará comezo ás 12:30 e a entrada será totalmente gratuíta.A Banda de Música Artística de Arcade, encargada do evento, preparou un amplo repertorio para celebrar con amigos e veciños este día dedicado á música.

O concerto deste ano ten un dobre obxectivo. Por unha banda está a clásica celebración de Santa Cecilia, patroa de todos os músicos, e por outra o render unha sentida homenaxe a Don Luciano Franco, un dos socios máis antigos da formación e que faleceu recentemente. Debido a este motivo o repertorio do recital centrarase en obras tradicionais galegas, as favoritas do homenaxeado. Entre outras pezas interpretaranse clásicos como “Negra Sombra”, “Lela” ou o clásico pasodobre de Gustavo Freire.