Un total de 27 mozos de Pazos de Borbén activan o seu futuro laboral

Un total de 27 mozos asistiron onte ao taller práctico “Activando ou teu futuro” organizado polo Concello de Pazos de Borbén en colaboración coa Dirección Xeral de Xuventude e Voluntariado da Xunta de Galicia. O obxectivo deste seminario era sensibilizar á mocidade do concello sobre as oportunidades que ofrece o autoemprego ademais de asesorala para unha correcta toma de decisións respecto do seu futuro profesional así como a mellor maneira de atopar un emprego.

Ademais de conceptos tan fundamentais como a construción dun bo curriculum vitae, as redes sociais ou a educación non formal, abordáronse temas como a motivación relacionada co emprego, a análise das oportunidades e a competitividade no mercado laboral ademais de achegar varias ferramentas que permitisen aos mozos optimizar as súas habilidades e destrezas para a toma de decisións no ámbito laboral.

A responsable do taller e da Oficina de Información Xuvenil do Concello de Pazos de Borbén, Isabel Fragueiro, destacou que esta sesión serviu para que os alumnos “sexan máis competitivos profesionalmente e poidan coñecelas nocións básicas relacionadas co emprego, o que lles facilitará a súa inserción no mundo laboral”. Así mesmo engadiu que os seus contidos se centraron “nos perfís que solicitan as ofertas de emprego” e tamén en dar a coñecer os trámites a seguir se se opta polo autoemprego.

Dirixido aos mozos do municipio que desexan incorporarse ao mercado laboral, ben como emprendedores ou por conta allea, esta actividade era totalmente gratuíta e atópase enmarcada no programa “Activa 2014” de laDirección Xeral de Xuventude e Voluntariado da Xunta de Galicia, polo que foi impartida por técnicos da Consellería de Traballo e Benestar.