O selo Mar Maior da Editorial Galaxia contribuirá a difundir a cultura galega no mundo

Editorial Galaxia lanzou o selo Mar Maior, destinado a difundir no mundo a cultura galega, tanto a través das súas obras clásicas como de autores contemporáneos. Ademais, ten unha vocación internacional, posto que, ademais de traballar en coedicións en inglés, francés e alemán, conta cunha filial en Buenos Aires e pronto estará tamén en Montevideo, México, São Paulo e Salvador de Bahía.

Para o primeiro lanzamento no mercado estatal, Mar Maior seleccionou catro textos clásicos de Álvaro Cunqueiro:’El año del cometa’, ‘Flores del año mil y pico de ave’, ‘Vida y fugas de Fanto Fantini della Gherardesca’ e ‘Tertulia de boticas prodigiosas’. En todos eles establécese, ademais, un diálogo entre o texto de Cunqueiro e un autor galego contemporáneo.

Ademais, para este primeiro lanzamento seleccionáronse tamén obras contemporáneas como ‘Futuro imperfecto’, de Xulia Alonso, unha crónica persoal da xeración dos 80, os seus descubrimentos e as súas consecuencias: o amor, a amizade, as drogas, o VIH ou a SIDA.

Así mesmo, Mar Maior tamén publicará o libro ‘Laura en el desierto’, de Antón Riveiro Coello, no que aparecen como escenarios Santiago de Compostela, Barcelona, Nova York e unha Europa convulsa durante a Segunda Guerra Mundial. Trátase dunha historia sobre a memoria, a culpa, o amor e a liberdad coa que o autor conseguiu o Premio da Crítica Española 2011.

Outro título contemporáneo é ‘Circe o el placer del azul’, a primeira novela da xornalista Begoña Caamaño, que relata unha parte nunca antes contada da historia de Circe e Penélope, dúas mulleres poderosas que tecen a catro mans unha relación epistolar tan imprevisible como apaixonante e reescriben así a súa historia, que é a historia da cultura europea e occidental. Xunto a eles, publícase tamén a ‘Historia de Galicia’, de Ramón Villares, presidente do Consello da Cultura Galega.