Lete Lasa visita o Club de mar de San Amaro e o campo de fútbol de San Tirso de Mabegondo

Lete Lasa na visita ao Club de Mar San Amaro

O secretario xeral para o Deporte, José Ramón Lete Lasa, sinalou ao Club de Mar de San Amaro como exemplo do papel vertebrador e de cohesión social que xogan as entidades deportivas alí onde desenvolven a súa actividade.

O titular de Deportes da Xunta visitou esta mañá as instalacións da emblemática entidade que leva preto de oitenta anos fomentando o deporte base e competitivo a través dunha ampla oferta de actividades deportivas e recreativas que desenvolve aos pés da Torre de Hércules e do barrio de Montealto na Coruña, e que abranguen, entre outras, o badminton, o tenis de mesa, a natación, o fútbol sala e o mergullo.

Ademais do presidente do club, Manuel Lugrís, e doutros directivos da entidade, na visita tamén estivo presente o xogador de tenis de mesa Alberto Seoane, deportista de alto nivel desde 2013 e campión do mundo por equipos no Mundial Paralímpico celebrado en China o pasado mes de setembro. O coruñés, que actualmente milita no Club Falcons Sabadell, formou parte do combinado español de tenis de mesa da clase 6-7 que acadou a victoria na cita mundial, ademais de que conquistou outros importantes logros deportivos na tempada 2013-14, tanto a nivel nacional como internacional.

Lete Lasa felicitou ao deportista paralímpico, ex do club herculino, polos títulos acadados nos últimos tempos, e desexoulle que siga encamiñándose con éxito cara aos xogos de Río 2016, á vez que expresou a súa esperanza de que o Club de Mar de San Amaro siga sendo canteira, no presente e no futuro, de deportistas de alto nivel como Alberto Seoane, ao tempo que promove a vida activa e os valores do deporte entre milleiros de coruñeses.

Visita ao campo de fútbol de San Tirso de Mabegondo

Posteriormente, o secretario xeral para o Deporte trasladouse ao concello de Abegondo, onde visitou o Campo de Fútbol Municipal de San Tirso de Mabegondo, acompañado polo alcalde José Antonio Santiso e pola delegada da Xunta na Coruña, Belén do Campo.

Lete Lasa puido comprobar o resultado das obras de mellora do terreo do xogo desta infraestrutura deportiva que o seu departamento contribuíu a financiar e que consistiron na instalación de herba artificial de última xeración, o que ademais de incrementar a calidade do campo permite o seu uso por un maior número de usuarios.

Neste sentido, o responsable de Deportes da Xunta amosou a súa satisfacción porque este campo poda dar servizo en mellores condicións aos numerosos practicantes de fútbol do concello que de modo crecente participan nas actividades da escola de fútbol, dos clubs -San Tirso S.D., Vizoño S.D. e C.F. de Veteranos de Crendes-, e das asociacións e agrupacións deportivas locais.